Гордан Калајџиев на информативен разговор во полиција

Претпоставувам дека ќе ме товарат за фрлање боја. Мојот одговор е дека тоа е нужна одбрана на правната држава, бидејќи на граѓаните не им останува друго средство, вели претседателот на Хелсиншкиот Комитет на Македонија

Гордан Калајџиев, прeтседател на Хелсиншкиот Комитет на Македонија и професор на Правниот факултет на УКИМ, утрово во 9 часот е повикан на информативен разговор во МВР, во врска со негово учество на протест на „шарената револуција“. Поканата за информативен разговор му ја предале полицајци, кои со службено полициско возило го дочекале пред неговиот дом, кога тој со синот се враќал од прошетка низ градот.

„Ова е еден вид автогол на тоталитарната власт“, вели Калајџиев.

„На разговор се повикуваат лица кои се залагаат за правда и правна држава, додека најголемите криминалци се на слобода и под заштита на полицијата. Како причина за поканата за разговор, буквално стои ‘учество во протести’. Учеството во протест не е уставно забранета категорија. Претпоставувам дека ќе ме товарат за фрлање боја, а мојот одговор ќе биде дека тоа е нужна одбрана на правната држава, бидејќи на граѓаните не им останува друго средство. Таа ‘штета’ од бојата е симболична и многу помала од државниот удар што и е нанесен на Македонија“, вели Калајџиев за ДВ.

Извор: Дојче Веле